Cadeirydd Partneriaeth Dyfrffyrdd

Am y rôl

Mae hon yn rôl newydd mewn sefydliad newydd ac rydym yn chwilio am bum person nodedig i helpu ein symud ymlaen dros y tair blynedd nesaf.

Gan adrodd i Ymddiriedolwyr a Chyngor yr Elusen, chi fydd y prif lysgennad ar gyfer eich Partneriaeth Dyfrffyrdd Leol, yn llywio dyfodol dyfrffyrdd yn eich ardal.

Bydd y Partneriaethau Dyfrffyrdd yn datblygu gweledigaeth gyffredinol ar gyfer eu dyfrffyrdd. Gan arwain ac ysbrydoli eich Partneriaeth, byddwch yn gweithio gyda'r rheolwyr dyfrffyrdd i ddatblygu strategaethau a chynlluniau ac annog mwy o bobl i ddefnyddio eu dyfrffordd leol a bod yn rhan o'i gwaith.

Byddwch yn eiriol dros fuddiannau dyfrffyrdd gydag arweinwyr a mudiadau gwleidyddol, busnes a'r sector gwirfoddol lleol ac yn helpu denu adnoddau ac arian newydd i gynnal a chadw'r dyfrffyrdd a'u gwella.Mae'r rolau'n wirfoddol ac fe delir treuliau, a golygant tua 3-5 diwrnod y mis o'ch amser.

Amdanoch chi

Rydym yn chwilio am bum unigolyn a chanddynt fedrau eithriadol. Yn ogystal â rhinweddau arwain rhagorol, byddwch yn rhwydweithiwr, cyfathrebwr a meddyliwr strategol hyderus. Bydd gennych yr hyder a'r crebwyll i fod yn ddylanwadol ar bob lefel. Bydd gennych brofiad o weithio mewn partneriaethau cymhleth yn cwmpasu'r sectorau cyhoeddus, preifat a gwirfoddol a phrofiad o weithio gyda mudiadau mawr.

Gallech fod yn gysylltiedig ag elusen yn barod, neu'n gweithio mewn gwleidyddiaeth neu'r sector masnachol. Beth bynnag eich cefndir, bydd gennych brofiad nodedig ar lefel uwch a byddwch yn fwy na pharod i helpu llywio dyfodol yr elusen dyfrffyrdd newydd.

Am yr elusen dyfrffyrdd newydd

Mae rhwydwaith 200-mlwydd oed gwledydd Prydain o gamlesi, afonydd a dociau hanesyddol yn denu dros 13 miliwn o bobl bob blwyddyn ar gyfer cerdded, beicio, pysgota, cychod neu fwynhau'r tawelwch braf.

Ym mis Ebrill 2012 bydd y dyfrffyrdd y mae Dyfrffyrdd Prydain yn gofalu amdanynt ac yn eu cynnal a'u cadw yn Lloegr a Chymru yn dod yn rhan o Elusen Dyfrffyrdd Newydd. Bydd yr Ymddiriedolaeth Dyfrffyrdd yn uno gyda'r elusen dyfrffyrdd newydd pan gaiff ei lansio.

Bydd y newid yn creu un o'r elusennau mwyaf yn y wlad a'r bwriad yw gwella cynaliadwyedd ariannol hirdymor ein dyfrffyrdd a rhoi mwy o rôl i'w defnyddwyr a'u budd-ddeiliaid.

Bydd yr elusen gyffrous newydd hon yn denu mwy o arian ac yn rhoi mwy o rôl i bobl leol yn y ffordd y caiff eu dyfrffyrdd eu rhedeg.